करका नियम पालना गरी जरिवानाबाट बच्न आग्रह
भक्तपुरः
आन्तरिक राजश्व कार्यालय भक्तपुरकी प्रमुख कर अधिकृत उषा पोखरेलले करका नियम पालना नगर्दा जरिवाना तिर्नुपर्ने भएकाले समयमा कर तिर्न आग्रह गरेकी छन् ।
भक्तपुर उद्योग वाणिज्य संघको आयोजना तथा आन्तरिक राजश्व कार्यालय भक्तपुरको सहकार्यमा बिहीबार सञ्चालन भएको करसम्बन्धी समस्या र समाधान विषयक अन्तरक्रिया कार्यक्रममा प्रमुख कर अधिकृत पोखरेलले करदाताबाट जरिवानासहित बढी राजश्व अशुल्ने कर कार्यालयको कुनै उद्देश्य नरहेको बताइन् । राज्यलाई कर तिर्नु करदाताको अनिवार्य दायित्व भएकोले दण्ड जरिवानाबाट बच्नको लागि उनले उद्योगी व्यवसायीहरुसँग आग्रह गरिन् ।
ऐनले तोकेका परिधि भित्र रहेर करदाताहरुले आफ्नो जिम्मेवारी पूरा गरेमा विभिन्न छुटका सुविधाहरु रहेको भन्दै उनले छुट सुविधाहरु सदुपयोग गर्नुपर्नेमा जोड दिइन् । कर कानुनको कार्यान्वयन गराउने निकाय कर कार्यालय भएकोले ऐन नियम पालना नगरेमा नियअनुसार दण्ड जरिवाना लाग्ने उनको भनाइ छ । जिल्लाका उद्योगी व्यवसायीहरुलाई भक्तपुर उद्योग वाणिज्य संघले करका बारेमा सुसूचित गराउन निर्वाह गरेको भूमिकाको प्रशंसा गर्दै उनले आगामी दिनमा संघसँग सहकार्य गरी करसँग सम्बन्धित विविध कार्यक्रम गर्ने बताइन् ।
संघका अध्यक्ष कृष्णमुरारी न्यौपानेले राज्यलाई कर तिर्नु करदाताको दायित्व रहेको भन्दै कर नतिरे जोकोही पनि कानुनअनुसार भागिदार हुनुपर्ने भएकोले सचेत हुनुपर्ने बताए । उनले राज्यलाई कर तिर्नु नागरिकको दायित्व र जिम्मेवारी भए पनि नागरिकलाई कर तिर्नुपर्छ भन्ने महसुस गराउने दायित्व राज्यको हुने स्पष्ट पारे ।
भक्तपुर उद्योग वाणिज्य संघले जिल्लाका करदाताहरुलाई करसँग सम्बन्धित विविध सूचनाहरु दिँदै आएको भन्दै उनले उद्योगी व्यवसायीहरुले कर भुक्तानी गर्ने बेलामा भोगिरहेका समस्यालाई सरल, सहज बनाउन न्यायशील र प्रगतिशील कर प्रणाली लागू हुनुपर्नेमा जोड दिए ।
संघका वरिष्ठ उपाध्यक्ष राजेन्द्रप्रसाद प्रजापति, कार्यसमिति सदस्य सन्तोषकुमार मिश्रलगायतले कर कार्यालय र करदाताबीच समधुर सम्बन्ध हुनुपर्ने धारणा राख्दै कर प्रशासन मितव्ययी हुनुपर्ने बताए ।
कार्यक्रममा आन्तरिक राजश्व कार्यालय भक्तपुरका कर अधिकृत राजेन्द्र कोइरालाले कर सम्बन्धी विविध विषयमा प्रस्तुतीकरण गरेका थिए । संघका सचिव गौतम सुजखूले सञ्चालन गरेको अन्तरक्रिया कार्यक्रममा भक्तपुर उद्योग वाणिज्य संघका पदाधिकारी एवं कार्यसमिति सदस्यहरू, जिल्लास्थित विभिन्न वस्तुगत संघका प्रतिनिधिहरु लगायत ९० जना उद्योगी व्यवसायीहरु उपस्थित रहेका थिए ।
निःशुल्क थाइराइड परीक्षण शिविरमा १८३ जनाले लिए सेवा
निःशुल्क थाइराइड परीक्षण शिविरमा १८३ जनाले लिए सेवा
भक्तपुर ः भक्तपुर उद्योग वाणिज्य संघको आयोजनामा आइतबार निःशुल्क थाइराइड परीक्षण शिविर सम्पन्न भएको छ ।
विश्व थाइराइड दिवसको अवसरमा भक्तपुर हार्ट एन्ड डायबिटिज सेन्टरको प्राविधिक सहयोगमा संघको भवनमा शिविर सञ्चालन गरिएको हो । शिविरमा १८३ जना लाभान्वित भएका छन् । शिविरमा निःशुल्क थाइराइड परीक्षण, सुगर जाँच र रक्तचाप परीक्षण गरिएको छ । शिविरमा सहभागीहरुलाई भक्तपुर हार्ट एन्ड डायबिटिज सेन्टरले विशेषज्ञ चिकित्सकबाट पहिलो पटकको लागि उपचार र परीक्षण निःशुल्क गरिदिने जनाएको छ । 
आयोजक संघकी अध्यक्ष रोशनीमैयाँ धौबन्जाले संघले सामाजिक उत्तरदायित्व बहनअन्तर्गत समय समयमा विभिन्न स्वास्थ्य सम्बन्धी कार्यक्रम गर्दै आएको जानकारी दिँदै त्यसकै निरन्तरता स्वरुप निःशुल्क थाइराइड परीक्षण शिविर आयोजना गरेको बताइन् । अस्वस्थकर जीवनशैली एवं तनावका कारण थायराइड हर्मोनका बिरामीको संख्यामा लगातार वृद्धि भइरहेकाले समयमै उपचार गरी रोगबाट बच्न शिविर राखिएको उनको भनाइ छ । समयमा उपचार नगरेमा हाइपरथाइराइडिज्मले मुटु र मस्तिष्कमा गम्भीर असर गर्ने हुनाले थाइराइड परीक्षण गरी रोग देखिएमा तुरुन्त विशेषज्ञ चिकित्सकबाट उपचार गराउन उनले आग्रह गरिन् ।
आर्थिक ऐनले प्रदान गरेका छुट सुविधाको भरपूर सदुपयोग गर्न आग्रह
आर्थिक ऐनले प्रदान गरेका छुट सुविधाको भरपूर सदुपयोग गर्न आग्रह
काठमाण्डौ । आन्तरिक राजश्व कार्यालय भक्तपुरका प्रमुख कर अधिकृत दिलिपकुमार गौतमले आर्थिक ऐन २०८१ ले प्रदान गरेका छुट सुविधाहरुको भरपूर सदुपयोग गर्न भक्तपुर जिल्लाका उद्योगी व्यवसायीहरुलाई आग्रह गरेका छन् ।
भक्तपुर उद्योग वाणिज्य संघ र आन्तरिक राजश्व कार्यालय भक्तपुरको संयुक्त आयोजनामा संघको सभाहलमा बिहीबार सञ्चालन भएको ‘आर्थिक ऐन २०८१ ले प्रदान गरेका छुट सुविधा एवं समसामयिक करका विषयमा छलफल तथा अन्तरक्रिया कार्यक्रम’मा प्रमुख कर अधिकृत गौतमले राज्यको अर्थतन्त्रमा निजी क्षेत्रको योगदान ठूलो रहेको भन्दै राज्यलाई तिर्नुपर्ने कर बिना जरिवाना समयमै तिरेर सहयोग गर्न आग्रह गरेका हुन् ।
जिल्लामा अझै पनि व्यवसाय दर्ता नगरी कारोवार गर्ने व्यवसायीहरुको संख्या धेरै रहेको उनको भनाइ छ । उनले व्यवसाय दर्ता गरेर कारोवार गर्नेमध्ये पनि ५० प्रतिशतभन्दा बढी व्यवसायीहरुले आय विवरण बुझाउने नगरेकोमा चिन्ता व्यक्त गर्दै सबैले समयमा कर तिरेर असल नागरिकको पहिचान कायम गर्नुपर्ने बताए ।
संघकी अध्यक्ष रोशनीमैयाँ धौबन्जाले आर्थिक ऐनमा उपलब्ध सेवा सुविधाहरुका साथै नीति नियमहरु बारेमा जानकार नहुँदा अधिकांश उद्योगी व्यवसायीहरुले अन्जानमा जरिवाना तिर्नुपर्ने अवस्था रहेको हुनाले कर बारेमा सुसूचित गराउने उद्देश्यका साथ कार्यक्रम राखिएको बताइन् । जिल्लाका उद्योगी व्यवसायीहरुको व्यापार व्यवसायको विकास र प्रवद्र्धन सँगै संघले विभिन्न समयमा कर सम्बन्धी छलफल, अन्तरक्रिया एवं तालिमहरु समेत सञ्चालन गर्दै आएको जानकारी दिइन् । यस किसिमका कार्यक्रमले उद्योगी व्यवसायीहरुमा रहेको कर सम्बन्धी अन्यौलतालाई न्यूनीकरण गर्न ठूलो सहयोग पुग्ने उनले विश्वास व्यक्त गरिन् ।
कार्यक्रममा भक्तपुर उद्योग वाणिज्य संघका वरिष्ठ उपाध्यक्ष कृष्णमुरारी न्यौपाने, उपाध्यक्ष दिनेश गोसाईंलगायतले कर तिर्नु सबै नागरिकको दायित्व रहेको भन्दै कर करले होइन रहरले तिर्ने वातावरण राज्य पक्षबाट बनाउनुपर्नेमा जोड दिए ।
कार्यक्रममा आन्तरिक राजश्व कार्यालय भक्तपुरका प्रमुख कर अधिकृत गौतमले आर्थिक ऐन २०८१ ले प्रदान गरेका विभिन्न छुट सुविधाहरुको बारेमा प्रस्तुतीकरण गरेका थिए । उनले आयकर ऐन, अन्त शुल्क ऐन, मदिरा ऐन लगायतमा भएका व्यवस्थाहरु, व्यवसायिक विषयमा आउने सवालहरुका बारेमा जानकारी गराएका थिए । वर्तमान अवस्थामा उद्योगी व्यवसायीहरुले भोगिरहेका कर सम्बन्धी समस्याका विषयमा सहभागीहरुले उठाएको प्रश्न तथा गुनासोको प्रमुख कर अधिकृत गौतमले प्रष्ट पारेका थिए ।
कार्यक्रममा भक्तपुर उद्योग वाणिज्य संघका पदाधिकारी एवं कार्यसमिति सदस्यहरू, जिल्लास्थित विभिन्न वस्तुगत संघका पदाधिकारीहरु लगायत १५२ जना उद्योगी व्यवसायीहरु उपस्थित रहेका थिए ।
source https://www.bizshala.com/article/4360
भक्तपुर उद्योग वाणिज्य संघ सदस्य नवीकरण गर्ने समय १४ दिन बाँकी
भक्तपुर उद्योग वाणिज्य संघ सदस्य नवीकरण गर्ने समय १४ दिन बाँकी
