News

मितिः २०८२ चैत्र २७
भक्तपुरः भक्तपुर उद्योग वाणिज्य संघले जिल्लाबाट प्रत्यक्ष एवं समानुपातिकतर्फबाट निर्वाचित प्रतिनिधिसभा सदस्यहरुलाई शुक्रबार बधाई तथा शुभकामना कार्यक्रम आयोजना गरेको छ ।
जिल्लाका उद्योगी व्यवसायीहरुको सहभागितामा संघको सभाहलमा एक कार्यक्रमका बीच निर्वाचित प्रतिनिधिसभा सदस्यहरुलाई बधाई दिँदै सम्मान गरिएको हो । कार्यक्रममा भक्तपुर क्षेत्र नं. १ बाट निर्वाचित प्रतिनिधिसभा सदस्य रुकेश रंजितले स्थानीय, प्रदेश र संघीय सरकारमा रहेको असमान कर दर, एउटै विषयमा पटक पटक कर तिर्नुपर्ने अवस्थाको अन्त्य गर्न आफू लागिपर्ने बताए । स्थानीय उद्योग व्यवसायको संरक्षण, भक्तपुर औद्योगिक क्षेत्रलाई हस्तकला ग्रामको रुपमा विकास गर्ने, भक्तपुरलाई डे टुरिजमबाट स्टे टुरिजमको रुपमा विकास गर्ने, भक्तपुरलाई शिक्षा, स्वास्थ्यको हब बनाउने लगायतका विषयमा आफूले गम्भीरताका साथ काम गर्ने उनको भनाइ छ ।
भक्तपुर क्षेत्र नं. २ बाट निर्वाचित प्रतिनिधिसभा सदस्य राजीव खत्रीले देश विकासमा निजी क्षेत्रको योगदान महत्वपूर्ण रहेकाले निजी क्षेत्रका समस्याहरुको सम्बोधन गरेर सरकार अगाडि बढ्नुपर्नेमा जोड दिए । निजी क्षेत्रको सहयोगबिना सरकार अगाडि बढ्ने नसक्ने भन्दै उनले उद्योगी व्यवसायीहरुले भोगिरहेका समस्याहरुको बारेमा सम्बोधन गर्नु राज्यको दायित्व रहेको बताए ।
समानुपातितर्फबाट निर्वाचित प्रतिनिधिसभा सदस्य मदनकृष्ण श्रेष्ठ, कुसुम महर्जन, डा. गंगालक्ष्मी अवालले जनताले आशा र भरोसाका साथ दिएको मतको भावना अनुसार जिल्लाको आर्थिक, सामाजिक, शिक्षा, स्वास्थ्य, कृषि, पर्यटन लगायतका क्षेत्रको विकासका लागि आफूहरु एकढिक्का भएर काम गर्ने बताए ।
यसैगरी, बागमती प्रदेश सरकारका स्वास्थ्यमन्त्री किरण थापाले जिल्लाको विकासका लागि स्थानीय जनप्रतिनिधि, प्रदेशसभा सदस्य र प्रतिनिधिसभा सदस्यहरु एक ठाउँमा बसेर घनिभूत छलफल गर्न आवश्यक रहेको बताए । भक्तपुरलाई मेडिकल हब बनाउन सम्भव रहेको बताउँदै उनले जिल्लाका सबै सरोकारवाला लगायत जनप्रतिनिधिहरु एक भएर लागेमा भक्तपुरको स्वास्थ्य क्षेत्रमा फड्को मार्न सकिने स्पष्ट पारे ।
त्यसैगरी, बागमती प्रदेश सरकारका संस्कृति तथा पर्यटनमन्त्री सुरेश श्रेष्ठले उद्योगी व्यवसायीहरुले सहज वातावरणमा उद्योग व्यवसाय सञ्चालन गर्न पाउनुपर्नेमा जोड दिँदै उद्योगी व्यवसायीहरुले वर्तमान अवस्थामा भोगिरहेका समस्या निराकरण गर्न प्रदेश स्तरबाट खेल्नुपर्ने भूमिका आफूहरुले खेल्ने र आवश्यक सहजीकरण गर्ने प्रतिबद्धता व्यक्त गरे ।
कार्यक्रममा संघका अध्यक्ष कृष्णमुरारी न्यौपानेले गत फागुन २१ गते सम्पन्न निर्वाचनबाट झन्डै दुईतिहाई नजिक मत प्राप्त सरकार बनेसँगै उद्योगी व्यवसायीहरु उत्साहित तथा आशावादी रहेको बताए । देशको अर्थतन्त्रमा निजी क्षेत्रको भूमिका बारेमा चर्चा गर्दै उनले भक्तपुर जिल्लालाई पूर्वाधारसहितको व्यवस्थित बसोबास भएको सहर, आर्थिक सम्भावनाहरुले युक्त सहर, कला संस्कृतिको संरक्षण रहेको सहर, पर्यटनका सम्भावनाहरु पूर्ण उपयोग भएको सहर बनाउनुपर्नेमा जोड दिए । जिल्लाबाट निर्वाचित प्रतिनिधिसभा सदस्यहरुलाई बधाई दिँदै उनले भक्तपुर जिल्ला र मुलुकको समग्र आर्थिक विकासका लागि आवश्यक कानुन निर्माण, नीतिगत सुधार र निजी क्षेत्रको मनोबल वृद्धिका लागि महत्वपूर्ण भूमिका निर्वाह हुने विश्वास व्यक्त गरे ।
संघका वरिष्ठ उपाध्यक्ष राजेन्द्रप्रसाद प्रजापति, उपाध्यक्ष गणेशहरि प्रजापतिलगायतले आआफ्नो धारणा राखेका थिए । कार्यक्रममा जिल्लाबाट प्रतिनिधिसभा निर्वाचनमा प्रत्यक्ष र समानुपातिकबाट निर्वाचित सांसदहरुलाई फूलमाला लगाई बधाई पत्र प्रदान गरिएको थियो भने सोही अवसरमा संघले प्रकाशन गरेको नयाँ वर्ष २०८३ सालको टेबुल क्यालेन्डर विमोचन गरिएको थियो ।

मितिः २०८२ चैत्र १७
भक्तपुर ः
भक्तपुर उद्योग वाणिज्य संघअन्तर्गत जिल्लाका महिला उद्यमीहरु सम्मिलित महिला उद्यमी उपसमिति मंगलबार गठन गरिएको छ ।
संघकी कार्यसमिति सदस्य एवं महिला उद्यमी मञ्जु सुवेदीको संयोजकत्व एवं सरस्वती कार्कीको सहसंयोजकत्वमा २० सदस्यीय उपसमिति गठन गरिएको हो । उपसमितिको सदस्यहरुमा श्रीलक्ष्मी पञ्च, देवका श्रेष्ठ, मुना राउत, तारा श्रेष्ठ, सन्ध्या श्रेष्ठ, मन्दिरा बास्कोटा रहेका छन् । यसैगरी, सदस्यहरुमा पुनम श्रेष्ठ, धनलक्ष्मी श्रेष्ठ, कविता श्रेष्ठ, नमिता शर्मा, सीता भण्डारी, संगिता दुलाल रहेका रहेका छन् । उपसमितिमा रहेका अन्य सदस्यहरुमा पिंकी तिमिल्सिना, रस्मिता बखुन्छें, सरु शिल्पकार, सावित्रा खड्का, दयालक्ष्मी किलम्बू र अनिता उप्रेती रहेका छन् ।
कार्यक्रममा संघका अध्यक्ष कृष्णमुरारी न्यौपानेले नवगठित महिला उद्यमी उपसमितिबाट महिला उद्यमशीलता विकासका लागि महत्वपूर्ण गतिविधिहरु सञ्चालन हुनुपर्नेमा जोड दिए । सफल उद्यमी व्यवसायीहरुको उदाहरण प्रस्तुत गर्दै उनले आफूमा दक्षता, योग्यता र सीपलाई विकास गर्दै दत्तचित्त भएर उद्यम गर्दै गएमा अवश्य पनि सफलता प्राप्त हुने बताए । महिला उद्यमी व्यवसायीहरुको विकासका लागि महिला उद्यमी उपसमितिमार्फत महिला लक्षित विभिन्न कार्यक्रमहरु तालिका बनाएर सञ्चालन गर्न आग्रह गर्दै उनले आवश्यक स्रोत साधनको व्यवस्थापन संघले गर्ने बताए ।
कार्यक्रममा संघकी निवर्तमान अध्यक्ष रोशनीमैयाँ धौबन्जा, कार्यसमिति सदस्य एवं उपसमितिकी संयोजक मञ्जु सुवेदी, कार्यसमिति सदस्य एवं उपसमितिकी सहसंयोजक सरस्वती कार्कीले उपसमितिले महिला उद्यमीहरुको नेतृत्व विकाससँगै महिला उद्यमीहरुको उद्यम व्यवसाय विकास गर्दै उत्पादित सेवा तथा वस्तुहरुको प्रवद्र्धन हुने कार्यक्रमलाई जोड दिने बताए ।

मितिः २०८२ फागुन २६
भक्तपुर ः
भक्तपुर उद्योग वाणिज्य संघ अन्तर्गत जिल्लाका युवा उद्यमीहरु सम्मिलित युवा उद्यमी उपसमिति मंगलबार गठन गरिएको छ ।
संघका कार्यसमिति सदस्य एवं युवा उद्यमी कृतन अवालको संयोजकत्व एवं शिशिर किसीको सहसंयोजकत्वमा २० सदस्यीय उपसमिति एक कार्यक्रमका बीच घोषणा गरिएको हो ।
उपसमितिको सदस्यहरुमा बिजोन त्वानाबासू, युगल राजभण्डारी, सलिन अवाल, निरज जंग, शैलेश न्यौपाने, रोमित माकजू, विशालजंग मल्ल, रोहित मानन्धर, सन्नी वैद्य रहेका छन् । यसैगरी सदस्यहरुमा सचिन राजवाहक, आयुष त्वानाबासू, अस्मिता श्रेष्ठ, विशाल प्रजापति, सुशान्त सुवाल, मुस्कान मानन्धर, सुजित दुवाल, निश्कर्ष घिमिरे र शिरिष माकजू श्रेष्ठ रहेका छन् ।
कार्यक्रममा संघका अध्यक्ष कृष्णमुरारी न्यौपानेले नवगठित युवा उद्यमी उपसमिति जिल्लाका नवउद्यमीहरुको लागि प्रेरणाको स्रोत बन्नु पर्नेमा जोड दिए । संघका वैधानिक उद्देश्य तथा लक्ष्यहरु प्राप्तिका लागि उपसमितिमा आबद्ध युवा उद्यमीहरुले महत्वपूर्ण भूमिका निर्वाह गर्ने विश्वास व्यक्त गर्दै उनले युवा उद्यमशीलता प्रवद्र्धन तथा विभिन्न व्यवसायिक गतिविधिमा संलग्न युवाहरुबीच सहकार्य गरी अगाडि बढ्ने उपसमितिको मुख्य उद्देश्य हुनुपर्ने बताए ।
नवगठित युवा उद्यमी उपसमितिका संयोजक अवालले युवाहरुको बढ्दो विदेश पलायनप्रति चिन्ता व्यक्त गर्दै देशमै व्यवसाय गरी आर्थिक उत्थान गर्न प्रेरित गर्ने आफूहरुको प्रमुख उद्देश्य रहेको बताए । देशमा विभिन्न व्यवसायको प्रशस्त सम्भावना रहेको भए पनि बजारको यथार्थ अनुसन्धानबिना व्यवसाय गर्नाले कयौं उद्यमी व्यवसायीहरु स्थापित हुन नसकी पलायन हुनुपर्ने अवस्थामा रहेको उनको भनाइ छ । उनले भक्तपुर उद्योग वाणिज्य संघको विशेष सहयोगमा जिल्लामा बिजनेस इन्क्युबेसन सेन्टर स्थापना गरी नवउद्यमीहरुलाई व्यवसाय प्रवद्र्धनका लागि सहयोग गर्ने तथाआवश्यक परामर्श दिने उद्देश्यका साथ उपसमितिमार्फत काम गर्ने आफूहरुको सोच रहेको उनले बताए ।
कार्यक्रममा संघका पूर्वअध्यक्ष एवं सल्लाहकार शिवप्रसाद मानन्धर, वरिष्ठ उपाध्यक्ष राजेन्द्रप्रसाद प्रजापतिलगायतले व्यवसाय सञ्चालनको क्रममा विभिन्न समस्या आउने हुँदा हतोत्साही नभई निरन्तर अगाडि बढेमा अवश्यक सफलता प्राप्त हुने बताए । युवा उद्यमीहरुले नयाँ व्यवसायिक योजनाको स्पष्ट खाका तयार गरी ल्याएमा आफूहरुले लगानीको वातावरण तयार गर्ने उनीहरुको भनाइ छ ।

भक्तपुर – भक्तपुर उद्योग वाणिज्य संघको अध्यक्षमा कृष्णमुरारी न्यौपाने चयन भएका छन् ।

संघको गत शुक्रबार र शनिबार भएको ३८ औं वार्षिक साधारणसभा तथा अधिवेशनबाट न्यौपाने अध्यक्षमा निर्विरोध चयन भएका हुन् । साधारणसभा तथा अधिवेशनले न्यौपानेसहित २४ सदस्यीय कार्यसमिति चयन गरेको हो ।

संघको वरिष्ठ उपाध्यक्षमा राजेन्द्रप्रसाद प्रजापति निर्वाचित भएका छन् । साधारण सदस्यतर्फको उपाध्यक्षमा दिनेश गोसाई, वस्तुगत सदस्यतर्फको उपाध्यक्षमा विश्वराम दुवाल र एशोसिएटतर्फको उपाध्यक्ष गणेशहरि प्रजापति निर्वाचित भए । यसैगरी, महासचिवमा रुकेश रंजित, सचिवमा गौतम सुजखू र कोषाध्यक्षमा रंजित मारिखू निर्वाचित भएका छन् ।

त्यसैगरी, कार्यसमिति सदस्यहरुमा अनिल शिवाकोटी, अमरबहादुर मानन्धर, ऋषिकेश श्रेष्ठ, गणेशभक्त गोसाई, नारायणप्रसाद भुसाल, महेशकुमार शर्मा, राजेश त्वानाबासू (राजु), राधाकृष्ण सापकोटा, सन्तोषकुमार मिश्र, सुरेन्द्र प्रजापति र श्यामप्रसाद मानन्धर निर्वाचित भए । महिलातर्फ कार्यसमिति सदस्यमा मञ्जु सुवेदी र सरस्वती कार्की तथा वस्तुगततर्फ कार्यसमिति सदस्यमा कृतन अवाल निर्वाचित भएका छन् । कार्यसमिति सदस्यमै एशोसिएटतर्फ बिजोन त्वानाबासू र शिशिर किसी निर्वाचित भएका छन् ।

महासचिव र एशोसिएटतर्फका कार्यसमिति सदस्यहरु बाहेक अन्य पदाधिकारी एवं कार्यसमिति सदस्यहरु निर्विरोध निर्वाचित भएको निर्वाचन समितिका संयोजक एवं प्रमुख निर्वाचन अधिकृत गजेन्द्रशंकर तिमिलाले जानकारी दिए । संघको नवनिर्वाचित नयाँ कार्यसमितिका पदाधिकारी एवं कार्यसमिति सदस्यहरुलाई शनिबार एक कार्यक्रमका बीच प्रमाण पत्र वितरण गरिएको छ । यसैगरी, नवनिर्वाचित पदाधिकारी एवं कार्यसमिति सदस्यहरुलाई प्रमुख निर्वाचन अधिकृत तिमिलाले सपथ गराए ।

नवनिर्वाचित अध्यक्ष न्यौपानेले आफूलाई निर्विरोध निर्वाचित गराएकोमा धन्यवाद दिँदै सबैको सल्लाह, सुझाव लिएर अगाडि बढ्ने बताउँदै सामूहिक कार्य र निर्णयबाट मात्र सफलता प्राप्त हुने भएकाले आफ्नो कार्यकाल सफल बनाउन सबैबाट साथ र सहयोग प्राप्त हुनेमा विश्वास व्यक्त गरे ।

निवर्तमान अध्यक्ष रोशनीमैयाँ धौबन्जाले आफ्नो कार्यकाल सफल बनाउन सहयोग गर्नुहुने पूर्वअध्यक्ष, पदाधिकारी एवं कार्यसमितिका सदस्यहरु लगायत सम्पूर्ण सदस्यहरुलाई धन्यवाद व्यक्त गर्दै नयाँ कार्यसमितिको पूर्ण सफल कार्यकालको लागि शुभकामना दिइन् ।

संघको ३८ औं वार्षिक साधारणसभा तथा अधिवेशनको उद्घाटन कार्यक्रम गत शुक्रबार भएको हो । साधारणसभा तथा अधिवेशनको उद्घाटन गर्दै नेपाल उद्योग वाणिज्य महासंघका अध्यक्ष चन्द्रप्रसाद ढकालले महासंघको संस्थागत सुधार, नीतिगत निरन्तरता र निजी क्षेत्रको एकताका लागि आगामी महाधिवेशनमा सर्वसम्मत नेतृत्व चयन आवश्यक रहेको र आफूले सर्वसम्मत नेतृत्व चयनका लागि पहल गर्ने बताए ।

महासंघले निजी क्षेत्रको साझा छाता संगठनको रूपमा नीतिगत सुधार, लगानीमैत्री वातावरण निर्माण, निजी क्षेत्रको हक–हित संरक्षणका लागि सरकारसँग निरन्तर संवाद र सहकार्य गर्दै आएको उनले जनाए । अध्यक्ष ढकालले निजी क्षेत्रलाई अख्तियारको दायरमा ल्याउन नहुने विषयको पैरवीदेखि अर्थतन्त्र सुधारको लागि उच्चस्तरीय आर्थिक सुधार आयोग गठन र लगानीमैत्री वातावरण निर्माणका लागि दजर्नौं कानुन संशोधनमा महासंघले महत्वपूर्ण भूमिका निर्वाह गरेको बताए ।